демалыс билеті

(Отпускной билет)

демалысқа босатылған әскери қызметшілерге берілетін белгіленген түрдегі құжат. Онда әскери қызметшінің әскери атағы, тегі, аты, әкесінің аты, демалыс түрі, демалысты өткізетін жердің (қала, ауыл) аты, демалыстың ұзақтық мерзімі (тәулік саны), демалыстан оралу мерзімі, берілген тасымал құжаттары көрсетіледі. Д.б-нің сыртқы бетінде әскери қызметшінің өзімен бірге болатын отбасы мүшелері көрсетіледі. Демалысын өткізген жердегі әскери комендант басқармасында, әскери комиссариатта немесе жергілікті жер әкімшілік органдарында келгені және кеткені (есепке алынғаны және шығарылғаны) туралы белгілер қойылады. Д.б. әскери бөлім командирінің (мекеме, әскери оқу орны бастығының) қолымен бекітіледі. Д.б. жеке куәлікпен (әскери билетпен) бірге ғана жарамды. Әскери қызметші демалыстан оралған соң Д.б-н штабқа тапсырады.